على طاري صباح الورد وإسمك والحلا والذوق .. ~~

على طاري صباح الورد وإسمك والحلا والذوق
ذكرتك يا اجمل أحلامي بقافي واستهليته

على درب القصيد أسوق قلبي والخطاوي شوق
وإذا مالت بي الخطوة على دربك تناسيته

يهز الشوق بأعماقي عناقيد الغرام عذوق
ويقطف بالغلا فيني غرامٍ خنت وأخفيته

أحبك كثر ما يشعل غرامك في حشاي حروق
وشبٌه زود لو يحرق ضلوعي مت مطفيته

أحبك دمعةٍ طاحت على خد الصباح اشروق
يموت النور لو طاحت على كفي وضميته

أحبك إيه أحب إسمك وأموت بجيدك المنتوق
تخيل كثر ما أكره صدودك قمت حبيتــه

تموت من البطا غيمه طعنها من جفاك بروق
غشى روض الحشا وسمي جفافك وإنت ما ارويته

تعال إجرح على كيفك تربع واستحل عروق
تدلل والبساط أحمر وأنا لرضاك مديتـــه

قم إسهج لآخر ضلوعي تغلغل داخلي برفوق
حلالك ما بقى مني مع اللي لجلك أفنيتــه

من اللي من غديت أجمل قصيدة ما غدا له ذوق
ومن اللي يكتب باسمك قصيده وانكسر بيتــه

وربي من كتبت إسمك وبروزته بقلبي فوق
وأنا ما دار في بالي قصيدٍ ما تحاليتــه

دخيل الدمعتين اللي غدت منها الخدود شقوق
ترفق سامحك ربي على قلبٍ لك أهديتــه

إذا لك حق في قلبي فأنا لي في غلاك حقوق
حقوق الشوق محفوظة وحدّي ما تعديتــه

يذكرني صباح الورد وإسمك والحلا والذوق
وأردد يا أجمل أحلامي بقافي يوم هليتـــــه

الله الله بجد رووووووووووووووعه
سلمت يمناك لاعدمناكٍ يامبدع
تقبل ارق التحيه

يسلمووووو على الطرح المبدع

يسلمو على المووضوع أخوي

تحياتي